නිල් වෙරළු සොයන මගක ඇවිද යමු ....
පළාත -
මධ්යම
දිස්ත්රික්කය
- මාතලේ
ගමන්
මාර්ගය - මාතලේ කූඹියන්ගොඩ පාර ඔස්සේ මාතලේ නගරයට පිවිස හිග්ගොල්ල පාරේ මීටර 500ක්
පමණ ඉදිරියට ගිය විට උද්යානයට පිවිසිය හැකිය
උදෑසන
හිරු රැසින් බැබළීගත් කුඩා පිණි බිදු එකිනෙකා පරයා වර්ණ සිත්තම් මවන්නේ නිල් පහැ
තණ පළස මත වැතිර ගත් රෝස හා සුදු පැහැ මල් කුමරියන්ගේ විදාගත් පෙති හැඩ කරමිනි.
රන්වන් පැහැ ගත් සේලයකින් හා රන් අභරණින් හැඩ වී තම ස්වාමියා සමග ඇවිද යන මේ යුවළ
තම ජිවිතයේ සිහින සිත්තම් කරන්නට තැත් කරන අයුරු පෙනෙයි. විල්ෂෙයා කදු පන්තිය
පාමුල මේ බිම් පෙදෙස වසාගත් මිහිදුම් සේලය තවත් නොබෝ වේලාවකින් ඉවත්ව යනු ඇත.
කලබලකාරී දවසක ඇරඹහමා යන සිතල නැවුම් මද නල ගත සිත ප්රබෝධයෙන් පුරවයි.
අක්කර
දහඅටක වපසරියක් පුරා විහිදුණු, මාතලේ තනායමට හා කිතුණු දේවස්ථානයටත් , තවත්
පසෙකින් විජය විද්යාලයටත් මායිම්ව පිහිටා ඇති රමණීය භූමියක මෙම උද්යානය
නිර්මිතය. මාතලේ හිටපු මන්ත්රීවරයෙකු
හා මාතලේ විජය විදුහලේ විදුහල්පති ධුරය දැරූ වී.ටී.නානායක්කාර මහතා නමින් මෙම උද්යානය
නම් කර ඇත.
ඓතිහාසික මාතලේ කැරැල්ලට සම්බන්ධ වූ විරුවන් අට දෙනෙකු ඉංග්රීසින්
විසින් අත්අඩංගුවට ගෙන මෙම උද්යානය ඉදිරිපස තිබූ ඇසළ ගසක එල්ලා මරා දැමූ බව
කියැවේ. අදටත් මේ උද්යාන භූමිය තුළ විවිධ වර්ගයේ විශාල කදන් සහිත අතුපතර පැතිර
ගත් ගස් තිබූ බවට සාධක ඉතිරිව ඇත්තේය. වසර දෙසියක පමණ ඉතිහාසයක් ඇති බව කියැවෙන බෝ
වෘක්ෂය ඒ සදහා සාක්ෂි දරයි.
ඡායාරූපය: අන්තර්ජාලයෙනි
එපමණක් නොව මෙහි ඇති දුර්ලභ ගණයේ ශාක අතර නිල් වෙරළුවලට (Elaeocarpus gannitrus) හිමි වන්නේ අද්විතීය ස්ථානයකි. රුද්රාරක්ෂ යනුවෙන් සංස්කෘතයේ දී
හැදින්වෙන නිල් වෙරළු හා සම්බන්ධ විශ්වාසයන් දෙකකි. හින්දුන්ට අනුව මෙම පළතුර රුද්ර
හෙවත් ශිව දෙවියන්ගේ ඇස් යන අරුත ගනියි. ඒ අනුව මේවායේ ශිව දෙවියන්ගේ ශක්තිය මෙන්ම ඖෂධීය ගුණයද අන්තර්ගත බව විශ්වාසයයි.
අනෙක නම්, රාම රාවණ කතා පුවතට සම්බන්ධය. එහි කියැවෙන්නේ රාම කුමරුට ඖෂධ සොයා
ඉන්දියාවට ගිය හනුමන්තා විසින් රැගෙන එන ලද කදුගැටයේ තිබී මෙම වෘක්ෂය ව්යාප්ත වූ
බවයි. කෙසේ වෙතත්, නිල් වෙරළු මෙහි ව්යාප්තවන්නට ඇත්තේ විදේශීය පක්ෂීන්ගෙන් බව
විද්යාත්මක මතය වී තිබේ.
මේ හැරුණු කොට උද්යානයේ තාල වර්ගයට අයත්වන ගස් වර්ග මෙන්ම විවිධ
විසිතුරු වෘක්ෂයෝද දැක ගත හැකිවෙයි. ඒ අනුව මෙය සියලු පරිසර පද්ධතින් එක්තැන් වූ
ක්ෂේම භූමියකට සමකළ හැකිය.
දාස්පෙතියා, රෝස, කානේෂන්, කපුරු ආදී වූ මල් ලෝකයේ මල් කුමරියන්ගෙන් හැඩවන
මෙම උද්යානයේ, මල්වල රොන් සුණු එක්කාසු කරන්නට ඉගිල යන සමනලයින්ගෙන් හා මී
මැස්සන්ගේ බිගු නදින් හැඩවී ඇත්තේය.
එමෙන්ම නා නා විධ පක්ෂීන්ගෙන් හැඩ වන මේ පරිසරය තුළ ලංකාවේ මධ්යම
කදුකර පරිසර පද්ධතියට ආවේණි පක්ෂීන් මෙන්ම සංචාරක පක්ෂීන් ද දැකගත හැකි බව හාත්පස
සිසාරා තම විමසිලිමත් දෑස යොමු කරන්නෙකුට පසක් වනු ඇත.
උදෑසන 7.00 සිට සවස 4.30 දක්ව මෙහි සිරි අසිරි නරඹන්නට අපට අවසර ලබා
දී ඇති අතර ටිකට් පතක මිල රුපියල් එකසිය පණහකි. සේවක මහත්මමහත්මීන් අට දෙනෙකුගෙන්
සමන්විතවන කාර්ය මණ්ඩලය හා මාතලේ මහ නගර සභාවේ පාලනයට නතුව මෙම උද්යානය පවත්වාගෙන
යනු ලැබේ.
මෑත භාගයේ දී විවිධ වෙනස්කම්වලට ලක්කළ මෙහි කෘෂි අංශය නියෝජනය කරමින්
ඖෂධ, මල්පැළ, පළතුරු ආදීන්ගෙන් සමන්විත වූ ආදර්ශ පැළ වගාවක් ද දැකගත හැකිය. එමෙන්ම
මෙහි කොම්පෝස්ට් ව්යාපෘතියක් ක්රියාත්මක කිරීමේ සැලසුමක් ද පවතින්නේ අනෙකුත් නගර
උද්යාන පාලනයට ආදර්ශ සපයමිනි. සොදුරු බිමක ගත කළ මේ හෝරා කිහිපය තුළ ගතට මෙන්ම
නෙතටද හරිත පෙතක සොදුරු බව විදින්ගන්නට හැකි වූයේ අප තවමත් මේ පින් බිමෙහි උපන්
පිනැතියන් වීම නිසාවෙනි.
2016 නොවැම්බර්
බුද්ධික එස්. රත්නායක
ටෙක්ලා චාන්දනී
Comments
Post a Comment