ත්‍රිකුණාමලය දුම්රිය ස්ථානය

කොළඹ කොටුවේ සිට ත්‍රිකුණාමල දුම්රිය මාර්ගයට පිවිසෙන දුම්රිය මගෙහි අවසන් නවාතැන්පොළ නම් ත්‍රිකුණාමලය දුම්රිය ස්ථානයයි. කිලෝමිටර 296 ක දුර ගෙවා උතුර සහ දකුණ යා කරන මාවතේ නැගෙනහිර ඉම වෙත දුම්රිය ළගා වන්නේ තෙත් හා වියළි කලාපයේ එකිනෙකින් වෙනස් වූ භූ කලාප පසුකරමිනි. මුහුදු මට්ටමේ සිට මීටර 1.83 ක පමණ උසකින් පිහිටා ඇති මෙම දුම්රිය ස්ථානය, ලංකාවේ අඩුම උසකින් පිහිටා ඇති දුම්රිය ස්ථානයක් ලෙසින් ද සැලකෙයි.

1927 වර්ෂයේ දී ආරම්භ කරන ලද ත්‍රිකුණාමල දුම්රිය මාර්ගයේ  පොල්ගහවෙල, මාහෝ, ගල්ඔය යන දුම්රිය ස්ථානවලින් ත්‍රිකුණාමලය දක්වා දිවෙන මාර්ගය වෙන් වෙයි. ගල්ඔය සිට නැගෙනහිරට ත්‍රිකුණාමලය දක්වා දිවෙන මාර්ගයේ අග්බෝපුර, කන්තලේ, ගල්තලාව, තම්පලකාමම්, චීන වරාය පසුකරමින් දුම්රිය ත්‍රිකුණාමලයට ළගා විය යුතුය. ගල් ඔයෙන් වමට හැරී ගමන් ගන්නා දුම්රිය මඩකලපුව වෙත ළගා වෙයි. තවමත් ඉපැරණි ගොඩනැගිලිවලින් සමන්විත වුවද නවීකරණයට ලක් වූ දුම්රිය ස්ථානය පිබිදෙන නැගෙනහිර නවෝදයට සාක්ෂියකි.

දශක ගණනාවක්  පුරා පැවැති යුදමය වාතාවරණය හේතුවෙන් ත්‍රිකුණාමලය දක්වා දිවෙන දුම්රිය ගමන් ඇතැම්විට අඩාලව පැවැතිය ද නැගෙනහිර ද්‍රවිඩ හා මුස්ලිම් ජනයාටත්, දකුණේ සිංහල ජනයාටත් ත්‍රිකුණාමලය දක්වා දුම්රියෙන් ගමන් කරන්නට දැන් තහංචි බාධා නොමැත. කොළඹ කොටුවෙන් ගමන් අරඹන නගරාන්තර දුම්රියකින් පැය හයක පමණ ගමනකින් අපට ගමනාන්තයට ළගා විය හැකිය. ඒ හැරුණු විට දිනපතා ත්‍රිකුණාමලය සිට කොළඹ දක්වා භාණ්ඩ ප්‍රවාහනය කරන දුම්රිය ද ගමන් කරයි. ත්‍රිකුණාමලය වෙත ඇදෙන සංචාරකයන්ට නම් දුම්රියෙන් නැගෙනහිර සංචාරයට යන ගමන අමතක නොවන මතක සටහන් එක්කරන්නට සමත් වනු නොඅනුමානය. 

2016 අගෝස්තු

බුද්ධික එස් රත්නායක

ටෙක්ලා චාන්දනී