ඉදුරාන ඇල්ල

ඉදුරාන ඇල්ල

පළාත -  සබරගමු පළාත

දිස්ත්‍රික්කය - කෑගල්ල දිස්ත්‍රික්කය

ප්‍රාදේශිය ලේකම් කොට්ඨාශය - රුවන්වැල්ල

ගමන් මග

1)     කොළඹ - කඩුවෙල - අවිස්සාවේල්ල - රුවන්වැල්ල ඔස්සේ

2)     කොළඹ - වැලිවේරිය - වහරක - රුවන්වැල්ල ඔස්සේ පැය එකහමාරක පමණ ගමනිකින් මෙහි ළගා විය හැකිය.

තුරු ගොමුවලින් වැසීගත් නිහඩ බිමෙහි ගලන මේ ජල බිදු අපට කියා දෙන පාඩම් නම් බොහෝමයකි. ඉදුරාම ඇය තවත් මේ ලක් මව් සරසන දිය ඇලි කුමරියකි. දිය ඇලි රැජිණියන් අතරේ ඇය සුකොමලව පියවර මනින “ඉදුරාන දිය ඇලි කුමරිය” අහිංසක කුමරියක් යැයි මට සිතෙයි. වන අරණ අතර ඈ නිහඩවම සක්මන් කරන්නේ තනිකමට ගස් කොළ සතා සිව්පාවුන් මෙන්ම කුරුඵ කොබෙයියන්ගේ ද ආදර බර වදන්වලට සවන් දෙමිනි. මිහිකත හමුවේ සරතැස නිවන්නට  ඉසව් සොයා යන ගමනේ දී ඇය අප විඩා නිවන්නට සමත් වූවාය.

කිසිදු කලෙක කිසිවෙකුටත් ‍නොදෙවැනි හැඩි දැඩි තම ස්වාමියාගේ සරතැස නිවන සෙනෙහෙබර බිරියක මෙන් ඇය ගල් කුළ වසා ගනිමින් තම සෙනෙහස පතුරවන සෙයකි. ඇගේ ඒ සෙනෙහස අන් අයට දෙනු නොකැමති හෙයින්දෝ මේ ගල් කුළ ඉතා රළු ලෙසින් නැගී සිටින්නේය. විඩාපත්වන නිසාවෙන් දෝ ‍ඇය ඇතැම් තැනක දී සුසිනිදු සුදෝ සුදු පෙණ පිඩු නංවන්නී එහෙත් කිසිදු විලාපයක් නම් නොනගන්නීය. ජීවන රිද්මයට අවනත වන්නී, ඒ ඇයමය. ඒ නිසාවෙන් ම ගලා යන මේ ජල තලයේ රිද්මය දෙසවන් විඩා නිවන්නට සමත් වන සංගීතයකි. මන්ද මාරුතයේ රිද්මයත් මේ ජල බිදු ගැටෙන රිද්මයත් අප සිත්සතන් ශාන්ත බවින් පුරවන්නට සමත් වෙයි. නිහඩවම තම අවට සහෘදයන්ගේ මෙන්ම කාලයාගේ ද සියලු වෙනස්වීම් දරාගනිමින් ඇය සක්මනෙහි යෙදෙන්නීය. ඒ දෙස බලා සිටින අපට ඇතැම් විටෙක ඇය රුදු යැයි හැගෙතත් ඒ රුදුබවට වැසීගත් සෙනෙහස අමිල බව පිළිගත යුතුමය.

නීල වර්ණ තුරු පෙළින් ඇය තම විඩාබර ගමනෙහි නවාතැන් පොළවල් තනන්නීය. ඒ අප වැනි මගීන්ට දිය දෝතකින් සප්පායම් වනු පිණිසමය. විඩාපත් කුරුළු පියාපත් තෙමාලමින් කුඩා ගල් කුළු අතරින් ගලා යන මේ නදී තොමෝ තම ගමන් මග අවුරා සිටින්නවුන් මග හැර යන්නීය. ස්වාමියා ඇය රැක ගන්නට උත්සාහ කරන්නාක් මෙන් පෙනී යන්නේ ඇගේ ගමන් මගේ වේගවත් බව අවම කරන්නට ඔහු ඇතැම් විටෙක උත්සාහ ගන්නා බැවිනි. ඒ ඇයට අනතුරක් වේ දෝ යන බියෙන් විය හැකිය.

ගලා යන සැඩ පහර මෙන්ම නිහඩව පියවර තබන කුඩා දිය බිදු ද සිත්තම් කරන මේ අපූර්ව සිතුවම් මතකයට එක් වන්නට ඉඩ හැරිය යුතුමය. ඇතැම් විටෙක ඇය කැටයම් ශිල්පිනියක බවට පත්ව ඇති අයුරු මේ දොළ පහරේ උඩුගං බලා යන අතරේ අපට පසක් විය. ඇතැම් විටෙක ඇය කෙළිලොල් බවින් පිරුණු දගකාරියගේ හැඩ මවා පාන්නී තවත් විටෙක උවැසියකගේ විලාසය ගන්නීය. ලක් පොළෝ තලයේ ඇගේ ලාලිත්‍ය සටහන් කරන්නට සමත් වී ඇති අයුරු නම් දෑස් අදහා ගත නොහැක්කේය. මේ කුමරියගේ මතක රැගෙන අපි පියවර මනින්නෙමු. ඇය තවත් අප වැනි විඩාබර වූවන්ගේ නෙත් සිත් පැහැරගනිමින් තම මගෙහි සක්මන් කරනු  නිසැකය.

2015 ජූලි 

බුද්ධික එස්. රත්නායක

ටෙක්ලා චාන්දනී